“እኔም የዕርቅ ሀሳብ አለኝ “ የሚል ወጣቱን አሳታፊ የሚያደርግ ፕሮጀክት ይፋ ሆነ፡፡

የዕርቀ ሠላም ኮሚሽን ሕብረተሰቡ በዕርቅና በሠላም ጉዳይ ላይ ንቁ ተሳትፎ እንዲያደርግ የተለያዩ ዕቅዶችን ነድፎ በመንቀሳቀስ ላይ ይገኛል፡፡ ይህንን ዕቅድ ተግባራዊ ለማድረግ ‘ቲክቫህ ኢትዮጲያ’  ከሚባል የቴሌ ግራም ቻናል ጋር በመተባበር ወጣቱን አሳታፊ የሆነ ፕሮጀክት ይፋ አድርገዋል፡፡ በርካታ ተከታዮች ያሉት ቻናሉ ወጣቱ በተለያዩ መስክ ያለውን እምቅ ችሎታ ተጠቀሞ  በየአካባቢያቸዉ ያለዉን ሰላምንና ዕርቅን ማስፈን ሚችሉ ሀገር በቀል እዉቀቶችንና የዕርቅ አፈታት ስርዓቶችን  እንዲለዩና ለሌላዉ ማህበረሰብ ክፍል እንዲያሳዉቁ የሚያስችል ነዉ፡፡ 
የገፁ አስተባባሪ ወጣት በረከት ጉዲሳ እንደተናገረዉ ወጣቱ የተለያዩ የመረጃ አሰባሰብ ዘዴዎችን ተጠቅሞ በየአካባቢያቸዉ ያለዉን የዕርቀ ሠላም ሀሳቦችን በተቀመጠባቸዉ የጊዜ ሰሌዳ መሰረት ማስረከብ ይኖርባቸዋል፡፡
 
ፕሮጀክቱን በይፋ ያስጀመሩት የዕርቀ ሰላም ኮሚሽን ሰብሳቢ ካርዲናል ብርሃነ እየሱስ ሱራፌል ይህ ‘ቲክቫህ ኢትዮጲያ’ አስተባባሪ ወጣቶች የያዙት ሀሳብ ከዕርቀ ሠላም ኮሚሽን ተልዕኮ ጋር በእጅጉ የሚገናኝ ስለሆነ ኮሚሽኑ ወጣቱን የሕብረተሰብ ክፍል ለሰብዓዊ አገልግሎትና ለእርቀ ሰላም ለማነሳሳት ከዚህ  ማህበራዊ ሚዲያ ጋር መስራት ጥሩ አማራጭ ነዉ ብለዋል፡፡
​
ወጣቱ ምንም እንኳ በሚከሰቱ ግጭቶች ቀዳሚ  ተሳታፊና ቀዳሚ ተጎጂ ቢሆንም የሰላም ግንባታ ዉስጥ ተሳታፊ እንዲሆን የሚደረገዉ እንቅስቃሴ ክፍተኛ የሚባል አይደለም፡፡  እንዲሁም በአካባቢዉ ያሉትን አገር በቀል የሠላም  እሴቶች እና የዕርቅ ስርአቱን የሰላም እንዲያዉቁ ሲደረግ አይስተዋልም፡፡ ክዚህ ባሻገር ወጣቱ የዕርቅና የሰላም እሴቶች እንዲተገብራቸዉና እንዲያዉቃቸዉ የሚስችል መደላደል አልተነደፈለትም፡፡  ይህ ከቲከቫህ የሚደረግ ፕሮጀክት እነዚህን በማህበረሰቡ ወስጥ የሚገኙ የዕርቅ ስርአቶች ወጣቱ እንዲመረምር እንዲያዉቅና በመረጃ የተደገፈ ጥናት እንዲያደርግ ያስችላል፡፡